Fonte: “Piemontèis ancheuj”

Saba 29 giugn 2013 al Museo Cìvich Alpin «Arnaldo Tazzetti» a Ussèj a l’é svolgiusse l’inaugurassion ëd na neuva session stòrica e artìstica dedicà al pitor Cesare Ferro Milone, an arcòrd ëd soa famija ch’a l’é originaria dla borgà Quajera. An cola ocasion ël fieul Francesco a l’ha fàit cadò al museo d’Ussèj, a nòm ëd soa famija, ëd doe euvre motobin significative dël pare, con l’intension ch’a ven-o esponùe an përmanensa an sò leu d’orìgin e andoa ch’a son ëstàite concepìe.

Una dj’euvre a rapresenta ij Portatori di slitte al monte andoa che, dzorpì dij porteur ëd le lese, a son rapresentà, con precision soasìa, le montagne ch’a fan da sfond a la sena.

L’àutra euvra dàita al Museo a l’é un pì che bel dissègn preparatòri, un bossèt, për cost quàder e ch’a rapresenta pròpi un ëd coj porteur.

Costa importanta donassion, an pì che rende ancora pì sgnor ël Museo, a costituiss l’artorn a ca ’d doe euvre ch’a l’han vist la lus an cost pais, an costa valada e sota a coste montagne scurpìe dal temp.

I sfruteroma ij nùmer ch’a vniran ëd costa publicassion për conté quaicòs ëd pì su Cesare Ferro, che da pitor ëd montagne a sarìa dventà ’l pitor ëd cort për ël rè dël Siam.

Con l’ocasion a l’é stàit publicà un bel catàlogh soagnà da Gian Giorgio Massara e Maria Luisa Tibone, sgnor ëd contnù e ’d fotografìe ch’a përmëtto al letor ëd dëscheurve l’ambient artìstich turinèis ëd l’inissi dël Neuvsent.

Ancheuj i parloma dël Museo d’Ussèj ch’a òspita, dzorpì ’d costa importanta donassion, d’àutre doe euvre ’d Cesare Ferro, as trata d’un aquarel dal tìtol Interno a Bangkok (1904-1907) ch’a l’é stàit aquisì quàich ani fa e ’l feuj orìginal ëd l’Esposission Internassional ëd Turin dël 1911, relativ al pavajon dël Siam andoa che Cesare Ferro a l’avìa esponù novanta quàder; ansema, ant la session dedicà a la pitura, a-i son ëdcò sinch piture a euli ’d n’àutr vajant pitor d’Ussèj, visadì Giuseppe Sauli (dont a l’é già parlasse su cost giornal).

An costa manera cost pcit Museo Alpin a s’anrichiss, ant la session dedicà a la coltura montagnin-a, ëdcò d’euvre che bin a na rapresento j’aspet ch’a l’han colpì la fantasìa dij pitor.

Fondà ’nt ël 2004 ël Museo a propon ëd colession naturalistiche, su bestie, piante, alpinism, mineraj, ròche e minere ch’a carateriso costa comba sarà fra j’ombre dla Lera e dla Lunela, an pì a-i son le colession d’atrass e d’oget ch’a parlo dla vita dle gent an mes a coste montagne. Peui a-i é, coma dit piror, la part artìstica che, ansema a j’àutre, a dà a la gent ch’a monta su fin-a sì la possibilità ’d dëscheurve ij tesòr e le blësse stërmà ’n na valada sgnora dë stòria e ’d memòria. Ussèj a l’é donca nen mach un leu ’d vilegiatura con montagne, aria polida, trute sospetose ant l’eva sclinta ch’a cola dal Ròciamlon, blëssa ’d senari e panorama, bòsch e fiòche, ma ’dcò un canton pressios ëd coltura nostran-a.