Fonte: “Piemontèis ancheuj”

Metello Merlo a fà part ëd na famija ’d vajant artista, Sò nòno Carlo a l’era un dissegnator ëd fris e dë stendard për Ca Savòja; sò pare Camilo (Turin, 1856-1931) a l’era un pì che bon paisagista e ’l fieul Metello, nassù për cas a Milan ant ël 1886 e rientrà con la famija a Turin ancora giovo, a continua con sucess l’atività da artista dla famija. Fin-a da fiolòt a l’avìa studià dissègn e pitura sota la guida dël pare, a l’era esercitasse con dë studi dal ver fin-a a dventé padron ëd tute le técniche, esperimentand ëdcò l’incision e la litografìa.

A l’era dedicasse a la natura mòrta e quàich vira a la figura, ma soa espression pì istintiva a l’avìa trovala ’nt la rapresentassion dël paisagi.

Fin-a da l’inissi ’d soa atività da pitor a l’avìa fàit amicissia con Felice Vellan, un pitor al qual ij turinèis a-j vorìo un baron ëd bin, e dël qual a l’avìa marià la seur.

Nen sodisfàit ëd lòn ch’a l’avìa mostraje so pare e vorend formesse na soa përsonalità, Metello a l’avìa ancaminà a frequenté lë studi ëd Vitòrio Cavalleri; an sèguit, tirà da la pitura e dal colorism strasordinari d’Andrea Tavernier, a l’avìa pensà ’d frequenté sò studi a Grottaferrata për completè ij sò studi.

Parèj ël giovo Metello as trasferìa ’nt ël Lazio e an col clima a l’avìa piturà d’euvre con ëd vedute ëd Frascati, Viterbo e d’ambient caraterìstich ëd cole tère.

Quand che, ant ël 1920, Tavernier a l’era trasferisse a Turin, Metello a l’avìa dàit dapress al vej Magìster con rispet e amirassion e a sarìa restaje dacant fin-a a la mòrt, rivà ’nt ël 1932.

Metello a l’avìa seguità a travajé an Piemont, con quàich curt sogiorn sla rivera lìgur e an Val d’Osta, realisand ëd paisagi e vedute ’d pais.

Ant soa vita a l’ha partessipà a un grand nùmer ëd mostre an Italia e a lë strangé.

Ant ël 1964 a l’avìa chità costa vita për continué a pituré lassù an cel.

La soa a l’é stàita na vita silensiosa, an mes a paisagi, colin-e fiorìe, paisòt ëd campagna e còse sempie. A l’ha parèj dedicà tuta soa vita a la pitura e la pitura a l’ha arcambialo con ël sucess.