Fonte: “Piemontèis ancheuj”

Për l’ocasion dij so otant’ani Tino Aime a l’ha realisà, mersì a un precis desideri dla Region Piemont ch’a veul arcordelo con cost cadò, na mostra antològica ’d soe euvre ant ij locaj dël Museo dla Montagna ’d Turin, ant la soasìa e adata curnis «dij Monti», al Mont dij Capussin [2012].

Tuti a conòsso Tino Aime, o përchè a l’é un pitor avosà o përchè a peulo avèjlo ancontrà për lo meno na vòlta ’nt la vita con col sò soris bon e soa espression da òm ëd la montagna ch’a smon sicurëssa.

Tino Aime a l’ha na stòria longa e sgnora d’aveniment. Chiel a l’é nà a Coni ’nt ël 1931, fieul ëd pastor originari ’d Roaschia; fin-a da cit a dà a vëdde soa predisposission për la pitura e donca a frequenta la Libera Accademia ’d Turin, andoa ch’a va dapress a j’insegnament ëd Idro Colombi, che a-j dà l’ampostassion al dissègn e a la pitura.

Soa natura caraterial e soe orìgin a lo posso a na vita ’d meditassion për creé e produve; apress as trasferirà a Gravere, an Val ëd Susa, andoa che sò mond sensa temp a peul esprimse për tràmit ëd le tèile. Ambelelì, fra ij bòsch, ij pra, ij bërgé e le bàite, Tino Aime a s’anandia con soa cariera artìstica, prima coma scultor e peui coma pitor e incisor.

Sò përcors pitòrich, dël tut mach figurativ, as esprim ant l’osservassion ëd le còse ’d tuti ij di, ëd la blëssa dla natura, ëd la montagna e ’d coj oget rùstich ëd la siviltà contadin-a e montagnin-a. As peul disse che la vita ’d Tino Aime a sia na conta infinìa ’d lòn ch’a lo circonda, andoa che minca di as dëscheurvo ij valor ëd le còse ùmij e ch’a rapresento la vita normal ëd chi ch’a viv an montagna e con la montagna.

Ant ël 1963 a l’ha esponù për la prima vira ij sò travaj. A l’é stàit un sucess! A l’ha peui otenù d’arconossiment, dzorpì che an Italia, an Fransa, an Romanìa e ant jë Stat Unì.

Tino Aime, con soa manera ’d fé pien-a ’d bel deuit, a l’è sèmper stàit present a le pì importante manifestassion turinèise e, ant ël 1983, soe euvre a l’han figurà ’nt l’avosà catalogh Prandi ’d Regio Emilia, ant ël 1992, la Region Piemont a l’avìa dedicaje na granda mostra përsonal.

Ant ël 1997 a realisava la pitura për ël Palio ’d Susa e ’l monument për ij sent ani dla corsa dle viture Susa-Monsnis.

Ant ël 2008 a realisava ’l monument për ij sent ani da la nassita ’d Cesare Pavese e, ant ël 2011, a arseivìa, a San Steo Belb, ël premi «Una vita per l’arte» dal Sénter Pavesian.

Tuti ij crìtich pì important, ant ël cors dël temp, a l’han scrivù ’d chiel arservandje ’d pàgine pien-e d’amirassion merità.

Mè car Tino, ëdcò noi dla redassion ëd Piemontèis Ancheuj, i voroma fete ij nòstri compliment për toa vita, për toa cariera, për toa pitura e për j’emossion ch’it l’has sèmper savune dé.

It voroma bin coma artista d’ecelensa e coma fieul grand ëd costa nòstra mare tèra ’d Piemont.

Coste nòstre pòche righe a serco d’esprime na part ëd tuta nòstra amicissia e simpatìa.

Coragi! Noi i voroma trovesse për ël pròssim traguard dij novanta e peui anans!