Michel dij Bonavé (Michele Bonavero) commemora Tòjo Fnoj con questa sua poesia intitolata “Piora nen Giandoja” (M.J.).

 Piora nen Giandoja

Piora nen Giandoja !

Ancheuj che ’l destin a l’ha virà soa manoja,

doman a-i sarà në s-cianch ëd seren ch’a të speta

për ëspecesse ’nt ël bindel che al còl as fà croata.

La nivoren-a l’ha dëscarià soa anfiura

ëd  lerme ’d bin e ’d sagrin a son pien ij paciass,

ant le man ëd na Giacomëtta l’é restaje ’l vel

adess che ti it vòle degordì sl’arcansiel

e an mes a le stèile it na vade a spass.

Piora nen Giandoja !

Già an Paradis j’angej a son-o la froja

e ti dël magon pì creus it l’has veuidà la doja

dësmentiand coj carlevé ’d famija

sarà ’nt ël burò o pendù coma quàder a la grija.

Piora nen Giandoja !

Ij dolor son grev e a peiso coma na panoja

strenzend ij cheur ant na mòrsa

che dla vita a ciucerìa minca fòrsa,

ma già ’l sol a torna për brilé qual cocarda

o soagn d’un tricòrn butà ’d ghignarda.

Piora nen Giandoja !

L’ànima l’é fòrta e già cheicòs fà broja,

sarà l’amor ch’at pija e dà l’arvangia,

sarà ’n tacon për stërmé sla toa muda ’d gala

cola blëssura che mai dventrà gogala,

sarà certëssa santa che ’l soris a torna

e a suverà coj pior ch’a l’han bagnà la gorna.

Piora nen Giandoja !

Ti it l’has un don pì grand ëd la bafoja

e gnun-e tëmme d’esse mës-cià a Griboja

nì ’d perd-te apress a chèich coja,

ti it ses Giandoja !

I së strenzoma a ti con l’afession pì s-cëtta

vardand an cel dëslijesse ’nt un seugn ëd comëtta

l’asar amèr ch’an lassa n’àutra Giacomëtta.

Ël temp sensa deuit a taja via costa amera fëtta,

ma për boneur an lassa dissendensa ’d Giacomëtta

përchè ’l carlevé dla vita a peussa seguité

pì fòrt dij deul ch’a ven-o për smorté.

Piora nen Giandoja !

Lassa che tò mantel a pija ’l brut e l’anvërtoja

sarandlo andrinta a col papé ’d caramela,

ant ël creus dël sùcher as guernerà

e con j’arcòrd ant ël cheur semper vivrà.

Ël fot a restrà sempitern a ’mpinì ola e miola,

ma dal grop che soens a ven a stenze la gola

nassrà na canson d’amor celesta

che con ti i canteroma a festa

pensand a chi, da lassù, sonand la froja,

ampiniend d’amel la veuida doja

at dirà : Piora pì nen Giandoja !

Piora nen, dësnò i pioroma ’dcò noi!

Michel dij Bonavé

(dij barbisin ëd Gambabòsch)

Panoja = Piega dla pel ch’a-i é sota la gola dij rumiant

Broja = Primi but ëd l’erba ’nt ij pra (bàucia)

Gogala = gòla d’aria, gòla sla pel

Gorna = Pera con na rainura gravà  ch’as buta ’nt le muraje për fé dëscarié l’eva dla pieuva

Bafoja = Babìa, ciàciara

Coja = Ròba da nen, ròba ’d pòca ’mportansa