Fonte: “Piemontèis ancheuj”

Dòp ëd na bela partìa d’ani passà a serché con passion e passiensa ’l dotor Giuseppe Monge, titolar ëd la Librerìa Antiquaria Peyrot ëd Turin, a l’è rivà a buté ’nsema pì che 1.500 document e material ëd reclam arferì a la cicolata; na bon-a part as riferiss a le pì avosà dite stòriche turinèise [2010].

An mes a costa sernia as treuvo donca ij nòm ëd Talmone, Moriondo e Gariglio, Beata e Perrone, Venchi Unica, Caffarel, Stratta, Giordano, Dolly, Streglio, Peyrano, De Coster, Daturi & Motta, Baratti & Milano e diverse àutre fàbriche che con soe reclam bin colorà e galupe a l’han fàit conòsse an tut ël mond, an manera nen confondìbila, la cicolata ’d Turin.

Con cost material a l’é donca stàita prontà na mostra ch’a cheuj ëdcò lìber e document ràir dij sécoj XVII e XVIII, manifest, figurin-e e drolarìe. Vorend trové ’n tìtol a costa esposission, ch’a va a postesse an mes a le tante manifestassion organisà an ocasion ëd l’ostension dël Sant Sudari, a l’é pròpi vnuit a taj un vej manifest ëd la Caffarel Prochet ch’a smon costa definission: «La cicolata dël Pelegrin».

Costa a l’é na mostra ràira e an na chèich manera fin-a dròla ch’a veul nen mach anteressé col pùblich pì «galup» o jë studios ëd la materia, ma tuti coj ch’a l’han gòj ëd vëdde o scoté la stòria ’d tuti ij di ’d Turin e chi, trovandse sota a j’euj manifest e reclam ëd costa sòrt, a podrà fé un sàut a l’andarera an mes a j’arcòrd ëd l’infansia; an costa manera a-i sarà pì che un che, ansema a le figure dla stòria publicitaria dla cicolata, a riussirà ’d sigur a sente ’n bon përfum ëd cicolata.