Fonte: “Piemontèis ancheuj”

Ij «DECALAGE» a son ëstàit tre amis e tre pitor che, ant j’ani apress ëd l’ùltima guèra, a l’han butà ansema soe idèje, l’ingegn e la volontà e parèj a l’ha dàit vita a ’n grup operativ ch’a l’ha fàit nasse a Turin un «moviment» artìstich dël tut neuv.

Costi tre amis a j’ero Felice De Cavero (Imperia 1908-Turin 1994), Attilio Aloisi (Palermo 1916-Turin 1998) e Nardo Girardi (Almèis 1914-1991); tuti e tre a l’avìo studià pitura an scòle e ambient divers e minca un con soa përsonalità a l’era chërsù ’nt ël mond ëd l’art.

L’ancontr ëd coste tre colture a l’avìa fàit nasse na colaborassion e na botega ùnica an sò géner ch’a l’avìa portà a na neuva adressa për la decorassion e l’aredament an Turin, a parte da l’inissi dj’ani sinquanta dël sécol passà.

Ël nòm «DECALAGE» a ven donca fòra da le litre inissiaj dij cognòm dij tre artista.

Ël prim atelié a l’era an Piassa Cavour ma, pen-a otenù ij prim sucess, ël grup as trasferìa an Via Cernaia sël canton con Piassa Solferin. Cost a l’era n’ambient ëd prestis ant ël sénter ëd la sità ’ndoa che costa botega a sarìa bin prest dventà ’n leugh d’ancontr colturaj e creativ.

Ij «DECALAGE» a l’avìo ’nventà ’n neuv prodòt ch’a përmëttìa ’d fissé an manera definitiva le superfis piturà sël bòsch e ’d rendje ’mpermeabij.

An cola botega d’art as creavo panej d’anlustrassion con ëd fàule dl’Età ’d Mes, taulin con ël pian decorà, oget d’aredament e tut lòn ch’a dovìa sodisfé j’esigense moderne dj’architet che an coj temp là a proponìo semper ëd neuve solussion për j’aredament. Cost local, ch’a l’era dventà pì che n’atelié ’n ver e pròpi laboratòri artìstich, a l’era frequentà da d’artisan e da architet e ambelelì as dësvlupavo ’d neuve idèje, materiaj neuv e técniche neuve për l’aplicassion ëd forme an arlev sël bòsch.

Ant ël 1957 ij «DECALAGE» a vnisìo ciamà dai cantié Ansaldo ’d Génoa për aredé vàire salòt ëd la famosa nav batià Leonardo da Vinci. Ant j’ani ’60 a l’avìo travajà a fé le decorassion dël cine Fiamma an Cors Trapani a Turin (che pròpi l’ann 2009 a l’é stàit campà giù. N.d.R.).

Da cola botega d’artista a son surtìe d’euvre ’d grand artisanat artìstich e con na concession neuva e moderna coma ij panej anlustrà për ij salòt, oget decorà con na fantasìa strasordinaria, euvre religiose, mascre për ël teatro, nature mòrte, oget fantàstich e fòra dla realtà ’d tuti ij di; ël tut semper realisà për dë spassi pùblich, ristorant, bar e ambient privà. A l’era na produssion ch’a mostrava al mond la granda serenità e la gòj ëd vive d’un period ant ël qual Turin a l’era sopatà da ’d fòrt contrast colturaj e ’d pitura ant l’arserca ’d na neuva espression figurativa.

A l’é passaje bastansa ’d temp e costi tre amis, ch’a l’avìo ’rnunsià a sò nòm, a ven-o arcordà coma ’n ràir esempi ’d na moderna botega dl’arnassiment andoa che minca un, con soe idèje e con soa destrëssa, a colaborava con j’àutri për realisé un seugn modern ant ël grand univers ëd l’art.