Fonte: “Piemontèis ancheuj”

Ël Museo cìvich Alpin d’Ussej a arcòrda (2010), con na mostra ’d na vinten-a ’d piture, ëd le quaj des a rafiguro ’d vedute d’Ussej, ël pitor turinèis Giuseppe Sauli, nà ’nt ël 1853. Ëd cost brav pitor a-i son bin pòche notissie e soe euvre bin da ràir a seurto sël mërcà dl’art.

Giuseppe Sauli a l’era part ëd na famija aisà e, vist ch’a l’era furnì ’d na bon-a predisposission al dissègn, a l’avìa ’ncaminà fin-a da masnà a ’nteressesse ’d pitura. An costa manera a sarìa peui formasse daspërchiel guardand e copiand j’euvre dj’artista ’d sò temp. Da giovo a l’avìa frequentà l’ambient artìstich turinèis e a l’avìa fàit amicissia con pitor e scultor ch’a travajavo an cola sità.

A l’era anandiasse a espon-e për la prima vira a la Promotriss ëd le Bele Art ëd Turin ant ël 1875, apress a l’avìa partessipà a la Mostra Nassional ëd Turin e a le mostre organisà dal Circol ëd j’Artista. Ant ël 1883 a l’avìa esponù soe euvre ’nt n’esposission a Roma e l’ann apress a la Mostra Internassional ëd Turin.

A le mostre chiel a partessipava semper con doe o tre euvre ch’a dimostravo soa satìa atività da pitor. Bele che a fussa soens present a j’esposission Sauli a vivìa an sò mond riservà a la mira che a l’anagrafe a l’era registrà coma «pitor indipendent».

Soa vita a scorìa tranquila e ordinà; chiel a piturava sle rive dël Pò, ant ël Canavèis, an Liguria, ma dzortut a Casalborgon, pais ëd nassensa ’d soa fomna Angela, andoa che minca ann a passava divers temp ant la cassin-a «Cottalorda», ëd proprietà dla famija dla fomna.

Ant ël 1912 a espon për l’ultima vira a la Promotriss ëd Turin. Ant ël 1913 la famija Sauli a fà costrùe a Ussej na vila e nòstr pitor, anciarmà da coj pòst ësgnor dë sponto suggesti e ’d na natura nen antamnà, a realisa ’d quàder con le vedute dij leugh ciamà Vilarèt, Cortevicio, Cròt e Perinera.

Ant ël 1928 Giuseppe Sauli a meuir a Turin dòpo na vita seren-a dedicà a la pitura e a vnirà sotrà ’nt ël camposant ëd Casalborgon.

Costa-sì d’Ussej (2010) a l’é la prima mostra ch’a ven organisà pròpi për cost pitor, autor d’euvre piasose për la semplicità e la freschëssa dij sò quàder ch’a esprimo la serenità e la pas d’un temp giumaj andàit a travers ëd vedute e ’d paisagi ’nluminà da ’n tranquil sol dl’apress disné.