Fonte: “Piemontèis ancheuj” 

Mario Lisa a l’é nà a Turin ai 23 ëd giugn dël 1908. Fin-a da fiolòt a dà manifestassion ëd curiosità vers la fotografìa e për vàire ani as dedica a fé ’l fotògrafo. Ant ël temp midem a ’ncamin-a a ’nteressesse al dissègn a man libera, copiand dal ver ëd soget sempi e popolar. Pòch për vira chiel a abandon-a l’atività da fotògrafo për dedichesse a la pitura e a espon-e ij prim travaj ant ël 1933. Finalment, ant ël 1937, a espon për la prima vira a la Promotris ëd le bele Art ëd Turin e ambelelì a presenta ’l ritrat ëd soa seur; a ven acredità d’un bon sucess, a conòss tanti artista che a lo ’ncoragio a continué sò travaj. Ancaminandse da l’ann apress a l’avrìa semper partessipà a le mostre dla Promotris ëd Turin. 

Ant ël 1942 a ten soa prima mostra përsonal a Biela, ansema a l’amis ëscultor Ettore Tinto. Ant ël 1945 a intra a fé part dël Cìrcol ëd j’Artista ’d Turin andoa ch’a ven acetà con afet e ambelelì a esponrà tuti j’ani soe euvre. 

Ant ël 1946 Mario Lisa as sent mur për afronté ’l grand pùblich turinèis e parèj a pronta na gròssa mostra a la Galerìa Fogliato; a l’é un grand sucess ëd visitator, ëd crìtica e ’d vèndite. 

L’ann apress a farà un sàut da l’àutra part dël grand baciass e a partessiperà a na mostra ’mportanta ’d pitura italian-a al museo dle bele Art ëd Caracas, an Venezuela. La fama ’d Mario Lisa a l’é giumai fortìa, la crìtica as esprim an manera semper favorèivol, fasendje ij compliment al sò mond sempi e a soa pitura s-cëtta e onesta. 

Antant chiel a viagia, soens as fërma për un pòch ëd temp a Venessia ’ndoa ch’a pitura ’d vëdùe piasose dij campielli; a l’é tirà ’dcò da Paris e, ant ël 1951, un sogiorn bastansa longh ant la capital fransèisa a-j dà l’ocasion ëd fërmé sla tèila ’d vedute che peui a esponrà, ant j’ani ch’a vniran dòp, an diverse mostre. 

Ant ël 1953 a propon al pùblich turinèis na mostra ’d soe ùltime euvre a l’avosà Galerìa Martina con l’arzultà d’un gròss sucess e an costa midema Galerìa a tornerà a espon-e na pì che bela serie ’d dissègn. An coj ani lì Mario Lisa a ’ncamina a partessipé a d’amportante mostre nassionaj e a na oten premi bondos e ’d consens semper pì favorevoj da part dij crìtich.

Al temp midem a viagia an gir për l’Euròpa; as fërma a pituré an Fransa, an Olanda, an Belgio, a Londra, an Spagna e peui fin-a a Istambul e Tunisi; quand ch’a torna dai sò viagi a pòrta d’impression ëd pitura maravijose che a fà vëdde ant j’esposission cissand un gròss anteresse da part dël pùblich.

mario Lisa a l’é un travajeur solengh e con un gròss impegn; ëd chiel a l’avìa scrivù ’l crìtich Luigi Carluccio : «Për Lisa la pitura a l’é na compagna ’d viagi. Soe mostre përsonaj a l’han semper avù ’l valor e ’l significà d’un diari, ëd në scartari ’d viagi...».

Chiel a l’é ’dcò stàit un pitor ëd còse ùmij e ’d tuti ij di osservà an sò malardriss con la curiosità ’d na masnà, ma smonù con granda poesìa; pcit quàder ch’a rafiguro ’n tòch ëd pan, ëd fior dij camp, la stendùa dij linseuj slargà al sol; un giacon con na bota an sacòcia, un fërton da cusin-a: un mond pòver e ùmil contà con la granda espression ëd la poesìa dij color e dij segn dël penel përchè mario Lisa a l’era vreman un poeta dla pitura.

A finiss sò përcors su costa Tèra ai 9 d’avril dël 1992 a Pianëssa con un ringret stragròss da part ëd j’amis e dij colega ch’a l’avìo semper apressialo e stimalo për soa onestà e soa modestia d’artista galantòm.