Fonte: “Piemontèis ancheuj” 

La famija Caffaro Rore a l’é d’orìgin canavzan-a, dij Léssoj (Lessolo), pòch lontan da Ivrèja.

Mario a nass aTurin ant ël 1910 an via Cardinal Murissi: pòch temp apress la famija as trasferiss ant la casòta, progetà dal pare, an via Mancini 14 e a costa adressa Mario Caffaro Rore a l’é stàit e a l’ha piturà për tuta la vita.

Dotà fin-a da l’infansia ’d capacità motobin bon-e për ël disegn e la senografìa, a l’ha dimostrà soe qualità ant j’ani dla scòla media ch’al’ha frequentà a l’Istituto La Salle ’d Turin.

Ancoragià dal pitor Luigi Rigorini a l’é presentasse a l’esame ’d selession për Liceo Artìstich e, mersì a soa bravura, a l’é scrivusse a lë scond ani.

Al’ùltim ann ëd LiceoArtìstich (a l’época ’l Liceo a l’era ’d tre ani e as ciamava Corso Inferiore) a l’ha otnù ij vot pì àut ëd tuti j’anlev dël Liceo e dl’Academia. An coj ani a l’é stàit anlev ëd Luigi Onetti. A l’é scrivusse a l’Academia e a l’ha travajà con Giacomo Grosso e Cesare Ferro.

A l’avia ancor pa finì jë studi ’d pitura che a travajava già, disegnand grande vedrià istorià për quasi tute le vedrerìe ’d Turin. I soma ant ël 1927: a prinsipia parèj l’aventura artìstica ’d Mario Caffaro Rore.

Al’ha studià j’antiche tecniche dla pitura che a l’ha utilisà për svilupé ij sò travaj. A l’é dedicasse pì che tut a la figura, al ritrat e a grande composission sacre ch’a l’ha esprimù con religiosa divossion.

A son tante, tante le Cese ch’a òspito soe euvre e a sarìa tròp longh elencheje tute, is limitoma a segnalé: Parochial ëd Verzeul, Cesa Abassial ëd Savijan, Capela dl’Istituto Salesian ëd Torre Annunziata, Santuari d’Oropa e tante, tante àutre, ma soa granda ciadeuvra a l’é la decorassion ëd la cùpola dla Catedral ëd Malta. A l’ha travajà tant për ij Salesian.

A l’é dedicasse ’dcò a la scultura e ij sò travaj a son ëspatarà an diverse Cese. A l’ha fàit ëdcò tanti ritrat ëd dignitari dla Cesa. Durant la vìsita a Còl Don Bòsch, Papa Gioann Pàul II a l’ha vorsù conòss-lo për esprimje làude për soa dedission vers l’art sacra.

An tute soe euvre religiose a l’é servisse, come modela, ëd soa sposa Olga a la qual a l’era gropà da sentiment ancreus. Soa fantasìa strasordinaria a l’ha portalo a pituré anche paisagi, bele viste senogràfiche, nature con fruta, composission con figure e nu.

A l’ha mnà soa vita da pitor coma n’artisan infatigàbil, an umiltà e rigor; a l’é stàit disegnator strasordinari e esigent con chiel midem e con j’àutri, ma a l’ha ’dcò vorsù trasmëtte sò savèj a quàich anlev, tra costi soa fija Adriana, la qual con tant afet, a contìnua l’euvra dël pare.

Ant ël giugn dël 2001 Mario Caffaro Rore a argionz ël cel për trascore l’eternità con ij Sant ch’a l’avìa piturà con tant amor.